Najugaq qimannagu perorsaanermik ilinniarneq.

Decentrale socialPædagogUddannelse (DPU) kalaallisut taaguuteqartoq Najugaq Qimannagu Perorsaanermik Ilinniarfik (NQPI).

Siunertaq

Najugaq qimannagu perorsaanermik ilinniarfeqarnikkut nuna tamakkerlugu pisariaqartinneqartunik perorsaasutut ilinniarnissamut periarfissaqarnissaa qulakkeerniarneqarpoq.

Bacheloritut perorsaanermik ilinniarnermut sanilliullugu najugaq  qimannagu perorsaanermik ilinniarnerup immikkoorutigaa sulinermut sammisuunerunera isumaginninnermilu ikiortinut, ukiuni arlalinni ulluunerani aamma ulloq unnuarlu paaqqinnittarfinni sulinermik misilittagalinnut sammitinneqarluni. Najugaq qimannagu perorsaanermik ilinniarnermi aallaavittut ilinniartup ilinniarnini tamakkerlugu atorfeqartitaanermi pissutsit attatiinnassavai.

Piumasaqaatit:

Ilinniarnermi tigutissagaanni

  1. Isumaginninnermi ikiortitut ilinniarneq angusiffiusimassasoq
  2. Ulluunerani/ulloq unnuarlu paaqqinnittarfinni sulinermik misilittagaqarneq
  3. Ilinniarnerup ingerlanerani atorfeqartitaaneq pillugu isumaqatigiissuteqarsimanissaq.

 

Qinnuteqartut piumasaqaatinik taakkuninnga uppernarsaasinnaasut tigutinnissamut misilitsissapput, misilitsinnermi allakkiamik, casemik apeqqutinillu tunineqassallutik nalunaaquttallu akunneri 4 ingerlaneranni allattariarsorluni akisassanik. Tigutinnissamut misilitsinnermi qinnuteqartut ataasiakkaat akissutaannik nalilersuinerit tunngavigalugit qinnuteqartut oqaloqatigiinnissamut aggersarneqassapput.

Qinnuteqartut ataatsimut ilisimasaat, sulisinnaassusiat piginnaanerilu nalilerneqassapput allattariarsornermi akissutaat oqaloqatigiinnermilu oqaluttariarsornerat aallaavigalugit.

Qinnuteqartuni ilaatigut makku isiginiarneqassapput:

  1. Qallunaatut oqaluttariarsornermi pisinnaasaat – allakkianik paasinnissinnaanerat, ilinniarnerup ingerlanerani ilinniutit teoriillu amerlanerit kalaallisut pigineqannginnerannik pissuteqartumik
  2. Nammineq sulinermik allaaserinninneq eqqarsaatiginninnerlu
  3. Ilinniarnermi tigutinnissamut kajumissuseqarneq
  4. Ataatsimut ilinniarnissamut naleqquttuuneq.

Najukkami suliassaqarfimmut aqutsisuusoq suleqatit immikkoortortaqarfinni allaneersut suleqatigalugit naliliissaaq. 

Holdit pilersinneqassapput ikinnerpaamik ilinniartut 15-iuppata ilinniartunulli 20-nut neqerooruteqartoqassalluni. Qinnuteqartut piumasaqaatinik naammassinnittut inissanit taaneqartunit amerlaneruppata piukkunnarnerpaat salliunneqassapput, takuuk qulaani taaneqartut. Tamatuma kingornatigut utaqqisut allattorsimaffiat suliarineqassaaq qaammatip siulliup ingerlanerani ilinniarnermik unitsitsisoqaratarsinnaanera eqqarsaatigalugu, taakkulu namminneq ilinniartutut oqaatigineqarsinnaassallutik.

Ilinniarnerup aallartinnera ingerlaneralu:

PI/SPS ilinniarnerup ingerlanissaa pillugu kommuninik isumaqatigiissuteqartarpoq, taamaattumik taakku aatsaat isumaqatigiissuteqarfigereernerisigut holdinik aallartitsisoqartarpoq.

Ilinniarneq semesterini 6-nni ingerlanneqartarpoq, taakkunannga ataaseq sapaatit akunnerini 13-ini paaqqinnittarfimmi allami suliffimmi misiliinertut pilersaarusiorneqartarluni, suliffigisamut ataneqartillugu paasisaqarnissaq siunertaalluni. Ilinniarnerup ingerlarnga ilinniartup sulinermi misilittakkamigut piginnaasat pigileriigai aallaavigalugit immersorneqassaaq kiisalu ilinniarnerup ingerlanera sulinermut atatinneqartuassalluni, taamaattumillu ilinniarnermut sivikillisaataasumik (merit) tunniussisoqarsinnaalluni.  

Ilinniartitsinermi oqaatsit atorneqartut – ilinniusiat annermik kalaallisuujupput, ilinniutilli teoriillu qallunaatuujullutik oqaatsit allat assersuutigalugu tuluttut/nunat avannarlermiutut minnerusumik atorneqarsinnaasassallutik.

Holdinik nutaanik allartitsisarneq pillugu apeqqutissaqaruit PI/SPS attaveqarfigisinnaavat. Aallaavittut kommunimi ataatsimi ilinniarneq ataasiinnaq ingerlanneqarsinnaavoq, tassa imaappoq ukiut pingasukkaarlugit aallartitsisoqarsinnaasoq.

Najugaq qimannagu perorsaanermik ilinniarneq pillugu annertunerusumik paasisaqarusukkuit uani  ilinniarnerup aaqqissugaanera nassaarisinnaavat – Ilinniarnerup aaqqissuunneqarnera

Ilinniarnerit 2018-imi siunissamilu ingerlasussatut aallartittussanut ilinniarnerup aaqqissugaanera Naalakkersuisoqarfimmit akuerineqarsimasoq nutarterlugu suliarineqaleruttortoq piaartumik ilanngunneqarumaarpoq.