ILINNIAKKAT

Perorsaasutut sammivilimmik bacheloritut ilinniarneq

Perorsaasutut ilinniarneq ulluinnarni taasarparput SPU. Kalaallit Nunaat perorsaasunik atorfissaqartitsivoq! Kalaallit inuiaqatigiit – soorlu inuiaqatgiinni allani aamma taamaattoq – sukkasuumik allanngoriartorput. Tamatuma nassataraa perorsaasut suliassaat unammilligassaallu pilersinneqartuarmata.
.

Qinnuteqarfissap killigitinnera

Kissaatigigukku perorsaasunngorniarluni ilinniarnermut tiguneqarnissat TAAVA illoqarfigisanni Piareersarfiup qinnuteqaatit tigoreersimassavaa kingusinnerpaamik 1. marts.

Suliffigineqarsinnaasut:

  • Ulluunerani paaqqinnittarfiit
  • Ulloq unnuarlu paaqqinnittarfiit
  • Atualeqqaat Innarluutilinnik sullissiviit
  • Utoqqarnernik sullissiviit
  • Pinerluuteqarsimasunik isumaginnittoqarfik
  • Siunnersuinermik aamma
  • pinaveersaartitsinermik suliaqarneq

Ilinniarnerup aaqqissuussaanera

Perorsaasunngorniarluni ilinniarneq sivisussuseqarpoq ukiut sisamaat avillugu – agguataarneqarluni semesterinut arfineq marlunnut ilinniarnerlu ingerlaqqiffiusumik ilinniarnertut isigineqarpoq. Piffissat suliffimmi sungiusarfiit marluupput tamarmik sap. ak. 14 18-nillu sivisussuseqartut. Ilinniakkap nassuiarneqarluarnera aamma sammiviit misilitsissutaasartullu uani ilinniarnerup aaqqissugaanerani atuarneqarsinnaavoq.

Ilinniarniarluni tiguneqarnissamut piumasaqaatit


Ilinniarnermut tiguneqassagaanni piumasaqaataavoq:

  • ilinniarnertuunngorniarnermi angusisimanissaq
  • imaluunniit 20’nik ukioqalereersimanissaq, allamik tassunga attuumassutilimmik atuagarsorluni ilinniarsimanissaq
  • imaluunniit Socialassistentitut (SAU) ilinniarneq naggataarlugu misilitsinnermi angusisimanissaq
Ilinniarnerup aallartinnissaa

Ukiut tamaasa augustimi atuaqatigiit ataatsit 22-t miss. ilinniartullit aallartittarput. Ilinniarnerup atuagarsornertaa taamaallaat Ilulissani pisinnaavoq.

Paasissutissat pingaarutillit

PI/SPS-mi Ilulissaniittumi ilinniartuuguit, illoqarfiup avataaniit aggerlutit inissiamik imaluunniit ineeqqamik pisatsersoreernikumik tunineqassaatit.

Inissiat ineeqqallu nutaajupput pisatsersoreernikuullutillu. Tamannalu isumaqarpoq pigisat pingaarutillit kisiisa nassarlugit maannarsinnaasutit. Kisiannili kissaatigigukku pisatat pigisat nassarusullugit akuersissutaavoq container-i 5,46m3 imaluunniit nassiussillutit annerpaamik 6 m3. Nammineerlutit pisattat poortornissaat, poortuinermilu anigaasartuutit isumagissuatit. Taamaattorli container-mik nassiussiniarlutit kissaateqaruit Perorsaanermik Ilinniarfimmut qinnuteqaammik immersugassamik piumassaatit.

Ilaqutariiullusi aggissagussi inissiamik tunineqassuusi. Inissiat ininik marlunnik initaqarput. Inissiani errorsisarfeqarpoq, errorsiveqarpoq aamma panersaaveqarluni.

Kisimiillutit aggissaguit ineeqqamik tunineqassuutit. Tassanilu isersimaartarfimmi ataatsimoorussanik atortorissaaruteqarpoq, errorsisarfeqarluni isaarissani tamani.

Inimik attartorneq inersimasumut ataatsimut 850,00 kr.-inik akeqarpoq.

Aningaasanik nakkartitsilluni oqarasuaat ilinniarfimmi pigineqarpoq, ilinniartunik atorneqarsinnaasoq.

Allaffik nalinginnaasumik ammasarpoq nal. 8.00 – 16.00, saaffigineqarsinnaasoq oqarasuaammut 38 35 50. Piffissamilu juli qaammat matoqqasinnaavoq imaluunniit ammasarnera annikinnerusinnaalluni.

Ilinniarfimmi allakkasuartaat email’at allaffik@pi.sps.gl

Annertunerusumik paasisaqarusukkaanni

Akissutit amigaateqarsorigukkit PI/SPS’imut sianernissannut imaluunniit mailernissannut tikilluaqquneqarputit.

Ilinniarnerup aaqqissuunneqarnera