ILINNIAKKAT

Socialassistentitut ilinniarneq

Socialassistentitut ilinniarneq ulluinnarni SAU-mik taaneqartarpoq. Holdi ilinniartunut 24-nik inissaqartoq ukiut tamaasa augustip qeqqani aallartittarpoq. Ilinniarneq sapaatit akunnerini 39-nik sivisussuseqartoq misilitsinnermik naammassineqartarpoq.

Ilinniarnermi siunertaq

Socialassistentitut ilinniarnermi siunertaavoq ilinniartut suliamut ilisimasaat sulisinnaassusiallu annertusassallugit, kiisalu suliassaqarfinni ilinniarnermut ilanngunneqarsimasut iluanni sulianut aalajangersimalluinnartunik atuagarsornernik periaatsinillu tunngaviusunik piginnaaneqalersissallugit.

Ilinniarnermi pingaarnerusutigut anguniagaasut marlunnut sammitinneqarput. Siullermik ilinniartoq ilinniarnikkut ilinniarnermut ingerlaqqiffiusumut ingerlaqqinnissaanut piukkunnarsassasoq. Aappaattut ilinniartup suliffimmi perorsaanermik sulineq piginnaaneqarfigilissagaa.  

Ilinniartoq ilinniarnini aqqutigalugu qallunaatut oqaatsit aappaat atorlugit GU-p assigisaanik qaffasissuseqartumik sulisinnaassuseqalissasoq piginnaaneqalissasorlu, kiisalu perorsaanerup iluani oqaatsinik atorneqartunik atuisinnaassuseqalissasoq.

Socialassistentitut ilinniarnerminik naammassisimasup piginnaasassai

Socialassistentitut ilinniartitaanerup anguniagaraa socialassistentit misissuisinnaassusermik, periaatsinik atuagarsuutinillu piginnaaneqalissasut, ilinniartitaanerup suliassaqarfiini pingaarnerni pingasuusuni; qallunaatut oqaatsit aappaattut, perorsaaneq tarnillu pissusii, kiisalu ilinniartup inuttut, attaveqarsinnaanera suleqateqarsinnaaneralu nukittorsassallugit.  Suliassaqarfiit pingaarnerit ilaqartinneqarput kulturi inuiaqatigiilerinerlu, kiisalu pinngorartitsineq aalanerlu. Misissuinermut periaatsinut isumaliutit ilinniakkat pillugit eqqarsaatiginninneq siuarsassavaat, qulakkiissallugulu ilinniartup ilisimasai atuagarsornermut, oqaluttuarisaanermut, kulturimut inuiaqatigiinnullu ataneqartinneqarnissaat.

Ilinniartitaanikkut anguniarneqarpoq socialassistenti ilinniarnerup naammassinerani ilikkagassat makku naammassisimassagai piginnaaneqarfigissallugillu:

  • Perorsaaneq pillugu allakkat tusagassiuutitigut qallunaatut oqaatsit aappaattut suliaasimasut ilisarsisinnaassasoq, misissuisinnaassasoq nalilersuisinnaassasorlu
  • Perorsaaneq aamma tarnip pissusii pillugit atuagarsuutit taaguutillu ineriartortinneqartut pillugit ilisimasanik atuisinnaassasoq namminerlu sulinini eqqarsaatigisinnaassallugu
  • Sulianut tunngatillugu anguniagassat periaatsillu tunngavilersugaasut aallaavigalugit perorsaanermi pilersaarusiorneq, ingerlatsineq nalilersuinerlu
  • Sulisutut suleqatinik, angajoqqaanik, meeqqanik atuisunillu suleqateqarsinnaaneq
  • Ilisimasassanik nutaanik ujartuisinnaaneq pigiliussisinnaanerlu

Tigutinnissamut piumasaqaatit

Socialassistentitut ilinniarnermut tigutissagaanni piumasaqaataavoq, qinnuteqartoq Isumaginninnermi ikiortitut ilinniarsimassasoq imaluunniit inuusuttunut inuussutissarsiutinullu ilinniartitaanermik allamik attuumassuteqartumik ilinniarsimassasoq.

Ilinniartussanik tiguneqartussanik toqqartuinermi siusinnerusukkut ilinniarnermit karakteerit tunngavigineqassapput. Qinnuteqartut ilinniartunut inissarititaasunit amerlaneruppata qinnuteqartut qallunaatut piginnaasamikkut qaffasinnerusumik inissisimasut tigutinnissamut nalilersuinermi ilaatinneqarsinnaapput.

PI/SPS tigutinneq sioqqullugu qinnuteqartoq qallunaatut misilitsinnissaanik piumaffigisinnaavaa. PI/SPS qinnuteqartunut tigutinnissamut piumasaqaatinik naammassinnittut misilitsinissaannut akisussaasuuvoq.

Tigutinnissamut piumasaqaatinit immikkut akuerineqarnissamut qinnuteqartoqarsinnaavoq Roktorimut kajumissaarummik allagaqartoqarneratigut immikkut akuerineqarnissamut tunngavilersuutitalerlugu. Siusinnerusukkut ilinniarsimanermit uppernarsaatit attuumassuteqartut kiisalu inuussutissarsiutitigut misilittakkat ilanngullugit nassiunneqassapput

Ilinniarnerup naammassineqareernerani

Ilinniartup ilinniarneq angusiffigiguniuk arlalinnik periarfissaqarpoq. Ilinniartoq:

  • Perorsaasutut sammivilimmik bacheloritut ilinniarnermut tigutinnissamut imaluunniit Najugaq qimannagu perorsaasunngorniarnermut tigutinnissamut qinnuteqarsinnaavoq
  • Ulluunerani paaqqinnittarfinnut, innarluutilinnik suliassaqarfimmut, utoqqarnik suliassaqarfimmut imaluunniit pinerluttunik isumaginnittunut atorfininnissamut qinnuteqarsinnaavoq

Qinnuteqarnissamut killiliussaq  

Socialassistentitut ilinniarnermut tigutinnissat kissaatigigukku qinnuteqaatit illoqarfimmi najugarisanni Majoriamut nassiutissavat. Majoriap qinnuteqaatit kingusinnerpaamik 1. marts tigoreersimassavaa.

Paasissutissat

PI/SPS-imi Ilinniartutut illoqarfimmit allameersuuguit ilinniartut ineqarfiini inimik pequsersukkamik tunineqassaatit.

Ilinniarnerup nalaani ilinniagaqarnersiuteqartoqassaaq.

Apeqqutissaqaruit PI/SPS-imut attaveqarnissamut tikilluaqqusaavutit mailikkut: allaffik@pi.sps.gl imaluunniit oqarasuaatikkut: 38 35 50-imut sianerlutit

Ilinniarneq pillugu nassuiarneqarluarnera una toorlugu atuarsinnaavat!