Perorsaanermik ilinniarfiup siulersuisuisa suleriaasiat innersuussutigalugu siulersuisut forstanderillu akornanni suliassat agguataarneqarnerat najoqqutassiami aalajangersarneqarput, matumani siulersuisut forstanderip PI/SPS-imik aqutsineranik nakkutilliineq ilanngullugu.

Siulersuisut Perorsaanermik Ilinniarfiup ingerlanneqarneranut periusissanut pingaarnerusutigut akisussaasuupput, soorlu aamma tunngaviusumik aalajangiinerit siulersuisunut saqqummiunneqartassasut.

PI/SPS-imi pissutsit sulisunut tunngasut Forstanderip oqartussaaffianiipput, matumani sulisunik aqutsineq nakkutilliinerlu ilanngullugit. Forstanderi sulinermini pingaarnersiuisassaaq suliassallu sulisunut attuumassuteqartunut agguaatissallugit.

Ulluinnarni aqutsisut suliassaminnik naammassinnissinnaassagunik aalajangiisuuvoq siulersuisut tapersersuinissaat tatiginninnissaallu – matumani oqartussaassusermik annertuumik agguaassineq ilanngullugu.

Ulluinnarni ingerlatsinermi suliarineqartartut ilaat, takuuk allaffissornerup illersorsinnaasumik aaqqissuunneqarnera, allattuineq, aningaasanik aqutsineq kiisalu soqutigisalinnik attaveqatigiinneq attaveqarnerlu Forstanderimit suliarineqassapput.

Forstanderip suliassat uku suliarineqarnerat isumagissavai:

• Takorluukkanut, Anguniagassanut pingaarnernut Periusissamullu tunngavissiat suliarissallugit
• Pilersaarusiornerata ingerlarnga isumagissallugu, matumani Takorluukkanut, Anguniagassanut pingaarnernut Periusissamullu iliuusissat pillugit sulisut oqaloqatigineri ilanngullugit.
• Ukiumut nalunaarummut missingiutip suliarineqarnera isumagissallugu – matumani ukiumoortumik naatsorsuutit ilanngullugit.
• Ukiumut missingersuutit akuerineqarsimasut iluanni aningaasaqarnikkut aalajangiineq.
• Ingerlatsinermik ulluinnarni nakkutilliineq.
• Suliffimmi sungiusarfinnik akuersinerit.
• Ilinniartut ilinniarnermik ingerlatsinerat pillugit suliat, soorlu assersuutigalugu tigutinnissamut piumasaqaatinit immikkut akuerineqarnerit, siusinnerusukkut ilinniarsimasat pissutigalugit ilinniarnermik sivikillisaanerit, naammagittaalliuutit il.il.
• Ilinniartitaanerit, atortulersuutit PI/SPS-illu illutai pillugit Naalakkersuisoqarfimmut attaveqarneq.
• Avataani soqutigisalinnik allanik oqaloqateqarneq – matumani tusagassiutinut nalunaarutinik nassiussisarneq ilanngullugu.
• Siulersuisunut ingerlaavartumik nalunaaruteqartarnermut akisussaaneq.
• Ilinniarnerit aaqqissugaanerisa pingaaruteqannginnerusuni naleqqussaanerit, ilinniarnermi ilikkagassatut anguniagaasunut sunniuteqanngitsut – siulersuisut akuliutsinneqassapput aatsaat ilinniartitaanerit imamikkut ingerlanneqarnerinullu annertunerusunik allannguteqartoqartillugu.
• Ilinniartitaanerit katitigaanerinut allannguutit iluarsiissutillu annikitsut akuerineqarnerat, assersuutigalugu suliniutinik suliaqarnermi, ilinniarnermut atatillugu nunani allaniinneq, sammisat pisariillisaaneq pissutigalugu semesterimit semesterimut allamut nuunneqarnerat.
• Paasissutissat pingaarutillit tamaasa siulersuisunut ingerlateqqittarnissaasa qulakkeernissaat.
• Siulittaasoq suleqatigalugu siulersuisut ataatsimiinnissaannik aaqqissuussineq.

Suliassat agguataarneqarnerannut najoqqutassiat qulaani taaneqartut ingerlaavartumik aaqqissuunneqarsinnaapput siulersuisut Forstanderillu isumaqatigiissuteqareerneratigut.

Siulersuisut Forstanderillu akornanni suliassat agguataarneqarnerannut najoqqutassiat allat, takuuk ileqqoreqqusat siulersuisullu suleriaasiat atuupput siulersuisut PI/SPS-imilu Rektorip suliassaasa agguataarneqarnerannut tunngatillugu.

Siulersuisut Forstanderimik nakkutilliineq paasissutissiisarnikkut siulersuisullu ataatsimiinneranni oqallittarnikkut, Forstanderip siulittaasullu ingerlaavartumik attaveqartarneratigut oqallittarneratigullu, kiisalu ukiumoortumik naliliisarnikkut aamma Siulittaasup, siulittaasup tullia Forstanderillu, oqaloqatigiinneratigut pisarpoq. Tassani oqallisigineqassapput suliassat qanoq naammassineqarsimanersut kiisalu illuatungeriit naammagisimaarnersut. Ineriartortitsineq pillugu isumaqatigiissutit imaqarniliamut ilanngullugit allanneqartassapput. Naliliineq oqaloqatigiinnerullu suleqatigiinnerup ilaattut isumaqatigiissummi aalajangersarneqarsimanissaat pingaaruteqarpoq, ajornartorsiutinik aatsaat pilertoqaraangat atorneqartassanatik.

Una isumaqatigiissut oktober 2017-imi siulersuisut ataatsimiinneranni akuersissutigineqarpoq.