Kalaallit Nunaat tamakkerlugu siunnersuisarnerup iluani piginnaanngorsaqqiineq politikikkut soqutigineqarlunilu kissaatigineqarpoq, taamaammat inulerinermi siunnersortitut ilinniagaq suliaqarnermut tunngasutigut piviusorsiortoq periarfissiissutigineqarpoq.
Inulerinermi siunnersortitut ilinniagaq piffissap ilaanut ilinniartitaanertut aaqqissuussaavoq, ilinniarneq ukiunik pingasunik sivisussuseqarpoq arfinilinnik semesterilik 12-inillu pilersaarusiukkanik ilinniartitaanissamut moduleqarluni. Ilinniarnerup ingerlanera modulini sammisat aallaavigalugit aaqqissuussaavoq ilinniagaq ineriartortikkumallugu ataqigiissikkumallugulu.
Perorsaanermi Ilinniarfimmi Inulerinermi siunnersortitut Ilinniakkamik angusineq Inulerinermi siunnersortitut taaguuteqartitsilissaaq. Danskisut ima taaguuteqarpoq: Rådgiver i Socialt Arbejde tuluttullu ima taaguuteqarluni: Counselor in Social Work.
Ilinniarneq
Ilinnialernissamut piumasaqaatit
Qinnuteqartup Ilinniagartuutut ilinniakkamut akuerisaanissaanut piumasaqaatit tassaapput
- ilinniarnertuutut naammassisimanissaq, imaluunniit
- niuernermi ilinniakkamik naammassinnissimanissaq, assersuutigalugu HK-mut tunngasumik ilinniagaq, imaluunniit
- isumaginninnerup iluani inuussutissarsiutitigut ilinniakkamik naammassinnissimanissaq, assersuutigalugu socialassistentitut, peqqissaanermut ikiortitut imaluunniit siunnersuinermi ikiortitut, imaluunniit
- meeqqat atuarfianni inaarutaasumik misilitsissimaneq ilanngunnagu naapertuuttumik akuerisamik ilinniarsimanissaq, assersuutigalugu attaveqatigiinnerup, oqaloqatiginneriaatsip iluini sivisuumik pikkorissarsimanissaq, assingusumilluunniit
Saniatigut aamma piumasaqaataavoq qinnuteqartup
- minnerpaamik ukiuni marlunni naapertuuttumik uppernarsaatitalimmillu isumaginninnerup iluani siunnersuisutut sulinermik misilittagaqarsimanissaa, aamma
- meeqqanut inuusuttunullu innarluutilinnulluunniit imaluunniit inersimasunik utoqqarnilluunniit aarlerinartorsiortunut tunngassutilinnut oqartussatut sullissisutut uppernarsaatitalimmik atorfeqarsimanissaa, aamma
- suliffigisaq peqatigalugu ilinniarnissaminut pilersaarusiorsimanissaa, tassani modulini ilinniartitaanerup akornanni sulinermi ilinniarneq qanoq isilluni salliunneqarnissaa ilaassaaq.
Ilinnniakkap sannaa aaqqissugaaneralu
Ilinniagaq ukiunik pingasunik sivisussuseqarpoq. Semesterimi ataatsimi modulit marluk ingerlanneqartarput nalinginnaasumik sapaatip akunnerinik marlunnik sivisussuseqartut, ilaatigut ullut angalaffiusut ilanngullugit.
Semesterip aallartinnginnerani semesteri tamaat ilinniarnissamut naatsorsuutigisatut pilersaarusiamik ilinniartut pissarsissapput. Piffissaq eqqarsaatigalugu atuakkanik atuarnissamut, suliassanik suliaqarnissamut modulillu sioqqullugit kingornalu sulineq pillugu isummersornissamut periarfissaqartitsisoqarniarluni ilinniarnerup modulii pilersaarusiorneqassapput.
Suliffissat ingerlariaqqifffissallu
Inulerinermi siunnersortitut ilinniakkamik naammassinnissimasut ukuninnga suliaqarnissaminnik piukkunnaateqalissapput:
- Inunnut ataasiakkaanut, eqimattakkaanut, kattuffinnut inuiaqatigiinnullu tunngasunut isumaginninnermi suliassanut atatillugu suussusersisinnaaneq, nassuiaasinnaaneq, misissuisinnaaneq, naliliisinnaaneq iliuuseqarsinnaanerlu
- Inatsisinut, atuisut inissisimaffiannut ingerlatsivimmilu suleriaatsinut naapertuuttumik oqartussaasutut sulianik isumaginnissinnaaneq aalajangiisinnaanerlu kiisalu aalajangernerit aallaavigalugit iliuuseqarsinnaaneq
- Isumaginninnermi suliat paasiniarnerinut inuiaqatigiinni aaqqissuussaanikkullu pissutsinik ilanngussisinnaaneq
- Suliamik ilisimasalittut atuisunut atassuteqalersinnaaneq kiisalu imminermut naleqartitanik, maligassianik isummanillu paasisimasaqarneq tunngavigalugu inunnik sullissisinnaaneq
- Isumaginninnerup iluani sulianik suliaqarneq ataqatigiissaarisinnaanerlu aamma isumaginninnerup iluani suliniutinik aaqqissuussineq, kiisalu siunnersuineq, aqqutissiuineq isumaginninnermilu pitsaaliuinermik ikiorsiinernillu suliaqarsinnaaneq
Paasissutissat pingaarnerit
Ilinniartitaanermi modulit Kalaallit Nunaanni sumiiffinni assigiinngitsuni ingerlanneqassapput. Ilinniarnermi ilinniartitaanermilu avatangiisit eqqarsaatigalugit ilinniartitaanermi modulit ilai PI/SPS-ip qitiusumik immikkoortortaqarfiani Ilulissani ingerlanneqassapput. Modulit allat sumiiffinni ilinniartitsisinnaanermut atortussanik pissarsiaqarfiusinnaasuni PI/SPS-ip sineriammi najugarisami immikkoortortaqarfiani allani sumiiffinniluunniit allani ingerlanneqarnissaat aaqqissuunneqassaaq. Ilinniartut allat peqatigalugit, ilaatigut isumaginninnermi assistentinngorniat isumaginninnermilu perorsaasunngorniat peqatigalugit sunniiveqatigiittarnissaq eqqarsaatigineqassaaq, isumaginninnermi suliaqarnermi sammisat kattutaarlugit sammivii paasisimasaqarfigilernissaat nukittorsarumallugu.
Ilinniartut ilinniakkamik aallartitsisussat amerlanerpaartaat sumi najugaqarnersut modulit aaqqissuunneqarnerini eqqarsaatigineqassaaq.
Ilinniagaq ukiunik pingasunik sivisussuseqarpoq. Semesterimi ataatsimi modulit marluk ingerlanneqartarput nalinginnaasumik sapaatip akunnerinik marlunnik sivisussuseqartut, ilaatigut ullut angalaffiusut ilanngullugit.
Attavissat
Ilinniagaq pillugu paasisaqarnerorusukkuit, ilinniartunik sullissivik attavigisinnaavat:
Telefon: +299 38 35 50
E-mail: allaffik@pi.sps.gl
Qinnuteqarneq
Inulerinermi siunnersortitut ilinnialernissamut qinnuteqarusukkuit sullissivik.gl aqqutigalugu qinnuteqarsinnaavutit.
Qinnuteqarneq ataavartumik ingerlavoq.
ILINNIARNISSAMUT QINNUTEQARIT
Ilinniarnerup aallartinnissaa qaammat ataaseq sioqqullugu akissutissap/allakkap/mail pissarsiarinissaa naatsorsuutigissavat – piffissami tassani tusagaqarsimanngikkuit ilinniartut allaffeqarfiannut saaffiginninnissannut tikilluaqqusaavutit.
Paasissutissat naatsut:
- Sivisussusaa: Ukiut pingasut
- Qinnuteqarfissaq kingulleq: Ataavartumik qinnuteqartoqarsinnaavoq
- Ilinniarneq aallartissaaq: Ukiaq 2024
- Aningaasarniat: Sulisitsisut