Perorsaanermik Ilinniarfiup / Socialpædagogisk Seminarium (PI/SPS) assigiinngitsunik ilinniakkanik neqerooruteqarpoq.
Taakkunani ilinniakkat pingasut, ilinniarnermut ilaatillugu suliffimmi misiliiffiusarput.
Nittartakkami qupperneq suliffimmi misiliinerit ilinniakkani pingasuniittut malittarisassai, piumasaqaataalu pillugit ilitsersuutitut atuutsinneqarpoq.
Qupperneq suliffimmi misiliisunut, suliffimmi misiliinermi ilinniartitsisunut, -aqqutissiuisunut, -ataqatigiissaarisumut suliffimmilu misiliiffinni pisortanut saaffiginnittuuvoq.
Taamatuttaaq qupperneq soqutiginnittunut paasissutissiissutaavoq soorlu ilinniariartortussanut.
Quppernermi takusinnaavatit ilinniakkani assigiinngitsuni suliffimmi misiliinerit pillugit paasissutissat, kiisalu suliffimmi misiliinermi quppersakkat isumaqatigiissutillu aasinnaallugit.
Praktikkoordinator
Oqarasuaat: +299 38 35 50 (nuutsitsisarfik)
Oqarasuaat: +299 38 35 52 (toqqaannartoq)
Suliffimmik misiliinerup ingerlarnga - Isumaginninnermi ikiortitut
August 2026 sioqqullugu aallartissimasunut (Ilinniarnerup aaqqissuussaanera pisoqaq malillugu)
Suliffimmi misiliineq marloriarluni ingerlanneqartarpoq, siullermi sap. akunneri 18-it aappassaaneerneranilu sap. akunneri 33-it. Suliffimmik misiliineq Isumaginninnermi ikiortitut ilinniarnerup ilagaa.
Suliffimmi misiliiffik aqqutissiuisorlu:
Ilinniartup nammineerluni suliffimmik misiliiffissamik nassaarnissani akisussaaffigaa, suliffimmi misiliiffiusinnaasut akuerisat akornanni.
Suliffimmi misiliiffiusinnaasut ilaatigut tassaapput: meeqqeriviit, meeraaqqeriviit, fritidshjemmi, klubbit, atuareernerup kingorna ornittakkat il. Il., kiisalu ulloq unnuarlu neqeroorutit, soorlu innarluutilinnut sullissivinni, najugaqatigiiffinni, utoqqaat illuini aammalu meeqqat angerlarsimaffianni.
Suliffimmi misiliiffissamik nassaarnermi, suliffimmi misiliisussaq suliffillu misiliiffiusussaq lærlingekontraktimik atsioqatigiissapput, praktik@pi.sps.gl-mut nassiunneqartumik.
Suliffimmi misiliiffiusup suliffimmi misiliinerup ingerlarnga akisussaaffigaa, aqqutissiuisoqartitsissallunilu. Suliffimmi misiliisoqarnermi aqqutissiuisumut piumasaqaataavoq ilinniartoq sapaatip akunnera allortarlugu akunneq ataaseq naapeqatigineqartassasoq, killiffissiuinermi kiisalu allattariarsorluni suliaqarnermi naliliinermi PI/SPS suleqatigineqassasoq. Tamatuma saniatigut suliffimmi misiliiffiusup suliffimmi misiliinermi anguniakkat anguneqarnissaat ilinniartumut suliakkiinikkut anguneqarsinnaanissaanut aqqutissiusseqataassaaq.
Suliffimmi misiliinermi aqqutissiuisoq ilinniagaqarnikkut tunuliaqutaqassaaq minnerpaamik socialmedhjælperitut, barnemedhjælperitut imaluunniit socialhjælperitut.
Suliffimmi misiliinermi sulinerup agguataarnera:
Sapaatip akunneranut 40 tiimit ilinniartoq suliffimmi misiliisutut inissisimasarpoq. Taakkunanilu tiimit suliffimmi misiliisup suliffini peqatigalugu pilersaarusiortassavai, ima agguarlugit:
- Nalunaaquttap akunneri 38-t suliffimmi misiliiffimmi sulineq
- Nalunaaquttap akunneri 2-t suliffimmi misiliisup ilinniarnermut atugassai
Sap. akunneranut ilinniarnermut atugassanit 2 tiimiusunit, sap. akunnera allortarlugu suliffimmi misiliinermi aqqutissiuisoq 1 tiimimik sivisussuseqartumik naapittassavaa. Tiimit sinneruttut ilinniartup nammineerluni misissuinerminut allattariarsorlunilu suliaqarnerminut ilinniarnerminullu atussavai, periarfissaappallu studiegruppeminut.
Suliffimmi misiliineq, malittarisassai piumasaqaataalu pillugit annerusumik paasisaqarniaruit Praktikmappe atuaruk, Quppersakkat isumaqatigiissutillu iluanniittoq.
August 2026-miit aallartittussanut (Ilinniarnerup aaqqissuussaanera nutaaq malillugu)
Suliffimmi misiliinermi siunertaq:
Ilinniartup suliffimmi misiliinermini ulluinnarni sulinini, perorsaanilerinermi inuttullu piginnaasaminik ineriartortitsinissaa siunertaavoq. Suliffimmi misiliinermi ilinniartoq isaumassuinermik, perorsaanilerinermik, attaveqaqatigiinnermik suleqatigiinnermillu misilittagaqalissaaq – sullitat meeraaneri, inuusuttuuneri, inersimasuuneri utoqqaaneriluunniit aallaavigalugit.
Suliffimmi misiliinerup sivisussusaa, sulinerullu agguataarnera:
Suliffimmi misiliineq sap. akunnerinik 17-inik sivisussuseqarpoq.
Sapaatip akunneranut 40 tiimit ilinniartoq suliffimmi misiliisutut inissisimasarpoq. Taakkunanilu tiimit suliffimmi misiliisup suliffini peqatigalugu pilersaarusiortassavai, ima agguarlugit:
- Nalunaaquttap akunneri 38-t suliffimmi misiliiffimmi sulineq
- Nalunaaquttap akunneri 2-t suliffimmi misiliisup ilinniarnermut atugassai
Suliffimmi misiliinermi aningaasarsiaqartitsisoqartanngilaq, ilinniagaqarnermusiat pillugit atugassarititaasut atuummata.
Suliffimmi misiliiffik aqqutissiuisorlu:
Suliffimmi misiliisoq aqqutissiuisoqartarpoq, ilisarititsinermik, suliaqarfimmi tapersersuinermik aaliangersimasumillu naapittarnernik isumaginnittumik. Suliffimmi misiliinermi aqqutissiuisoq piffissa qiteqqinnerani naalerneranilu naliliinernik suliaqartarpoq.
Ilikkagassatut anguniakkat allaaserinnillunilu suliassaq:
Suliffimmi misiliisoq ilinniarnermi ilikkagassatut anguniakkat aallaavigalugit suliffimmi misiliisarpoq, allaaserinnillunilu suliffimmi misiliinerup sap. akunnerisa 8-anni tunniussisussaalluni, ilinniartitsisumit nalilerneqartussamik.
PI/SPS-miit attaveqarneq:
Suliffimmi misiliisup ineriartornerani ilinniartitsisoq uku aqqutigalugit malinnaasarpoq:
- Aallartinnermi attaveqarneq
- Sap. akunnerisa 9-anni suliffimmi misiliiffimmut pulaarneq
- Suliffimmi misiliinermi allaaserinninnermi aqqutissiuussineq
- Suliffimmi misiliinermik naliliineq naggasiinerlu
Suliffimmi misiliineq, malittarisassai piumasaqaataalu pillugit annerusumik paasisaqarniaruit Praktikmappe atuaruk, “Quppersakkat isumaqatigiissutillu” iluanniittoq.
Suliffimmik misiliinerup ingerlarnga - Pædagogassistentitut
Maannakkut atuuttoq:
Suliffimmi misiliineq pillugu massakkut atuuttoq:
Suliffimmi misiliineq ilinniarnermi modulit akornanni inissisimasarpoq.
Sapaatip akunneranut 40 tiimit ilinniartoq suliffimmi misiliisutut inissisimasarpoq. Taakkunanilu tiimit suliffimmi misiliisup suliffini peqatigalugu pilersaarusiortassavai, ima agguarlugit:
- Nalunaaquttap akunneri 30-t suliffimmi misiliiffimmi sulineq
- Nalunaaquttap akunneri 10-t suliffimmi misiliisup ilinniarnermut atugassai
Ilinniarnerup nalaani ilinniartup suliffimmi misiliinermini sungiusarnissaminut periutsitigullu misiliinissamut sinaakkutit pilersittarpai, aammattaaq ilinniartup nammineq perorsaanermik inuuniutitut suliani sullitatillu misissorsinnaallugit.
Qinnuteqartut namminneq suliffimmi misiliinissamut qinnuteqaateqarlutillu ilinniagaqarnissamik pilersaarusiortariaqarput, ukiunilu marlunni suliffimmi misiliinissamut isumaqatigiissuteqarlutik.
August 2026-miit atuutilertussat:
Suliffimmi misiliinermi quppersagaq atorneqalissaaq, taannalu ilinniartunut ingerlareersunut nutaanullu atuutissaaq.
- Suliffimmi misiliinermi tamakkiisumik ilinniartut suliffimmi misiliinermi isumaqatigiissut atulissavaat.
- Atorfeqareerlutik ilinniartut Ilinniarnermi pilersaarut / Uddannelsesplan atuinnassavaat.
Suliffimmi misiliineq:
Ilinniarnerup nalaani ilinniartup suliffimmi misiliinissaminnut periutsitigullu misiliinissamut sinaakkutit pilersittarpai, aammattaaq suliffimmi misiliisup nammineq perorsaanermik inuuniutitut suliani sullitatillu misissorsinnaallugit.
Suliffimmi misiliinermi siunertaq:
Suliffimmi misiliinermi siunertaavoq ilinniartup suliaqarfimmi, perorsaanilerinermi inuttullu piginnaasai ineriartortissallugit
- Nutaaliorsinnaanermi saqqummeriaatsinillu piginnaasatigut
- Misissueqqissaarsinnaanermi piginnaasatigut (nalunaarsuineq, misissueqqissaarneq eqqarsaatiginneqqissaarsinnaaneq)
- Attaveqaqatigiinnermi piginnaasatigut
- Inuit akornanni suleqatiginnissinnaanikkullu piginnaasatigut
- Iliuusissanik aaliangersaasinnaanikkut piginnaasatigut (pilersaarusiorneq, ingerlatsineq naliliineq)
Suliffimmi misiliinerup sivisussusaa, sulinerullu agguataarnera:
Suliffimmik misiliineq moduli immikkoortuisa akornanni ingerlanneqartarpoq.
Sapaatip akunneranut 40 tiimit ilinniartoq suliffimmi misiliisutut inissisimasarpoq. Taakkunanilu tiimit suliffimmi misiliisup suliffini peqatigalugu pilersaarusiortassavai, ima agguarlugit:
- Nalunaaquttap akunneri 30-t suliffimmi misiliiffimmi sulineq
- Nalunaaquttap akunneri 10-t suliffimmi misiliisup ilinniarnermut atugassai (atuarnermut, allaaserisanut, aqqutissiortinnermut eqqarsaatiginneqqissaarnernullu atorneqartussat)
Ilinniarneq suliffimmiinnerlu:
Suliutigalutik ilinniartut:
- Ilinniartoq suliffimmi atorfeqarpoq, aammalu suliffigisaminiit akissarsiaqartinneqarluni.
- Ilinniarnerup ingerlarnga pisortaq peqatigalugu pilersaarusiorneqassaaq.
- Sulinngiffeqarnermut tunngasut suliffimmi malitassat malillugit ingerlassapput.
Ilinniartut (piffissaq tamakkiisoq)
- Suliffimmi misiliinermi aningaasarsiaqartitsisoqartanngilaq, ilinniagaqarnermusiat pillugit atugassarititaasut atuummata.
- Ilinniartoq sulisutut naatsorsuussaanani, suliffimmi misiliisutut isigineqassaaq.
- Ilinniarnermi sulinngiffeqarnermut tunngasut ilinniakkami aqutsimit suliarineqartarput, ilinniarnerullu aallartinnerani suliffimmi misiliiffinnut nassiunneqartarlutik.
- Suliffimmi misiliisoq aqqutissiuisoqartinneqarpoq, ulluinnarni paarlaasseqatigiinnermi oqaloqatigiinnermilu suliaqarfimmi tapersersuisuusumik.
Suliffimmi misiliineq, malittarisassai piumasaqaataalu pillugit annerusumik paasisaqarniaruit Praktikmappe atuaruk, “Quppersakkat isumaqatigiissutillu” iluanniittoq.
Suliffimmik misiliinerup ingerlarnga - Perorsaasutut bacheloritut sammivilimmik ilinniarnermi
Suliffimmi misiliinerit perorsaasutut sammivilimmik bacheloritut ilinniarnermi ilaapput.
Suliffimmi misiliinerup sivisussusaa, sulinerullu agguataarnera:
Perorsaasutut ilinniarnermi suliffimmi misiliinerit marluupput:
- Suliffimmi misiliineq siulleq: 2. semesterimi, sap. akunneri 14-it (nalinginnaasumik suliffimmi misiliineq)
- Suliffimmi misiliineq tulleq: 5. semesterimi, sap. akuuneri 18-it (immikkut ilisimasaqarluni suliffimmi misiliineq)
Sapaatip akunneranut 40 tiimit sulisoqartarpoq, ima agguarsimasunik:
- Nalunaaquttap akunneri 28-it perorsaanilerinermik suliffimmi misiliiffimmi sulineq
- Nalunaaquttap akunnera aqqutissiuisorlu naapinneq
- Nalunaaquttap akunneri 10-it ilinniarnermut atugassat (allaaserinninneq, atuarneq, portfolio il.il.)
Suliffimmi misiliiffiup ingerlariusia, takkuttarfii perorsaanilerinermilu sammisai malillugit sulineq ingerlasarpoq.
Suliffimmi misiliiffik aqqutissiuisorlu:
Suliffimmi misiliiffiusup suliffimmi misiliinerup ingerlarnga akisussaaffigaa, aqqutissiuisoqartitsissallunilu. Suliffimmi misiliisumut aqqutissiuisup ulluinnarni attaveqarneq akisussaaffigaa, naliliinerit marluk, suliffimmilu misiliisup suliaqarfimmi ineriartornera, misilittagai eqqarsaatiginneqqissaartarneralu eqqarsaatigalugit pingaaruteqarluni inissisimalluni.
Allaaserisassanut tunngatillugu suliffimmi misiliisoq suliarinninnissaminut nammineq akisussaasuuvoq. Suliffimmi misiliinermi aqqutissiuisoq qulequttamik, suliaqarfimmilu sammisuunissaanut taamaallaat aqqutissiuisinnaavoq, ilinniartitsisup allaaserinninnermi aqqutissiuineq ingerlattarmagu.
Suliffimmi misiliinerup akuerineqarnera:
Suliffimmi misiliineq nalilerneqartarpoq uku tunngavigalugit:
1.Suliffimmi misiliinermi aqqutissiuisup naliliinera
2.Suliffimmi misiliinermi ilinniartitsisup præsentationsportfoliomik akuersinera
Pineqartut tamarmik akuerineqarsimassapput, ilinniarneq ingerlaqqissappat.
Suliffimmi misiliineq, malittarisassai piumasaqaataalu pillugit annerusumik paasisaqarniaruit Praktikmappe atuaruk, “Quppersakkat isumaqatigiissutillu” iluanniittoq.
Suliffimmi misiliinermi quppersagaq
Perorsaanermik Ilinniarfik / Socialpædagogisk Seminarium-imi ilinniakkat suliffimmi misiliinermik imaqartut tamarmik, suliffimmi misiliinermi quppersagaqartinneqarput, ilinniartunit suliffimmilu misiliiffinnit sinaakkutit, akisussaaffiit piumasaqaatillu atuutsinneqartut ersarissumik ataatsimoorussamillu paasissutissartai pissarsiarineqarsinnaassammata.
Suliffimmi misiliinermi quppersakkat, ilinniakkanut suliffimmi misiliiffiusartunut immikkut naleqqussagaapput. Quppersakkanik nutarterineq ingerlaartuartuuvoq, taamaattumik oqaaseqaatit, pitsanngorsaatissat apeqqutissalluunniit tamaasa praktik@pi.sps.gl-mut apuunneqartarnissaat neriuutigaarput.
Suliffimmi misiliinermi quppersakkat ilitsersuutitut isigineqassapput, tassani nassuiarneqartarlutik:
- Suliffimmi misiliinermi atugassarititaasut malittarisassallu
- Suliffimmi misiliisumut, suliffimmi misiliisumut aqqutissiuisumut, pisortamut, suliffimmi misiliisumut ilinniartitsisumut -ataqatigiissaarisumullu inissisimaffiit akisussaaffiillu
- Suliffimmi misiliinermi ilikkagassatut anguniakkat
- Suliffimmi misiliinissamut isumaqatigiissusiornermi, allannguinermi aammali atorunnaarsitsinermi malitassat
- Nalorninermi, unamminartorsiornermiluunniit attavissat
Suliffimmi misiliinermi quppersakkat isumaqatigiissutillu atuuttut, suliffimmi misiliinermi attuumassuteqartunit malinneqarnissaat naatsorsuutigineqarpoq.
Isumaginninnermi ikiortitut
Relevante dokumenter i forbindelse med praktikperioden
Pædagogassistenti
- -
Perorsaasutut bacheloritut sammivilimmik ilinniarnermi
- -