Siulersuisut inissitsiternerat

§ 1. Siulersuisut ataatsimiinnerminni siullermi inissitsitissapput. Siulersuisut akunnerminni siulittaasumik siulittaasullu tullianik toqqaassapput. Qinersineq amerlanerussuteqarnikkut pissaaq. Siulittaasup siulittaasullu tulliata piffissaq atuuffiat siulersuisut piffissaq atuuffiat malissavaat.

1.1. Siulittaasoq siulersuisut atuuffiisa nalaanni tunuaruni, siulersuisut siulittaasumik nutaamik qinersissapput, taamatuttaaq siulittaasup tullia piffissami qinersiffiup ingerlanerani tunuarpat.

Siulersuisut ataatsimiinnerat

§ 2. Siulersuisut ataatsimiinnerminni aalajangiisarput. Siulersuisunut ilaasortat tamarmik siulersuisut aalajangerneranut peqataanissamut periarfissaqassapput. Siuleruisunut ilaasortaq peqataasutut piginnaatitsissummik tunniussisinnaanngilaq.

§ 2.1. Siulersuisut ukiumut ataatsimiinnissatik pilersaarusiussavaat.  Immikkut ataatsimiinneq ingerlanneqarsinnaavoq siulittaasup pisariaqartutut nalilerpagu imaluunniit siulersuisut affaasa imaluunniit forstanderip piumasarippagu.

§ 2.2. Siulersuisut aalajangersinnaapput siulersuisut ataatsimiinnerat oqarasuaatikkut imaluunniit isiginnaarutit aqqutigalugit ingerlanneqassasoq.

§ 2.3. Siulersuisut ataatsimiinnerini aalajangiiffigisanut imaqarniliortoqartassaaq, takuuk immikkoortoq 6.

§ 2.4. Imaqarniliaq siulersuisunut nassiunneqartassaaq kingusinnerpaamik ataatsimiinnerup sapaatit akunneri marluk qaangiunnerisa kingornatigut.

§ 2.5. Siulersuisunut ilaasortat ataasiakkaat pisussaapput siulersuisutut sulinermi paasissutissat pisariaqartut piginissaat qulakkiissallugit. Siulersuisunut ilaasortaq kinaluunniit PI/SPS-imi pissutsit pillugit paasissutissanik piumasaqarsinnaavoq, matumani allagaatit suulluunniit ilanngullugit, siulersuisuni ilaasortap siulersuisutut sulinermi pisariaqartutut nalilerpagit. Taakku pillugit siulittaasoq qinnuigineqassaaq.

§ 2.6. Ataatsimiinnernut peqataasinnaannginnermut nalunaarnerit allakkatigut pisassapput, taakkununnga elektroniskimik, oqarasuaatikkut siulersuisut allattaanut (forstanderi) saaffiginninnerit ilaapput.

Siulersuisut ataatsimiinneranut aggersaanerit

§ 3. Siulittaasoq siulersuisut nalinginnaasumik ataatsimiinneranut aggersaassaaq sivikinnerpaamik sapaatit akunneri 4 ataatsimiinnissaq sioqqullugu. Siulittaasup ataatsimiinnissamut piffissaq sumiiffissarlu aalajangissavai. Siulittaasoq pisinnaanngikkuni siulittaasup tullia periuseq malillugu aggersaasinnaavoq.

§ 3.1. Aggersaaneq ullormut oqaluuserisassaagallartunik ilaqartinneqassaaq.

§ 3.2. Forstanderi siulersuisut ataatsimiinnissaata tungaanut piffissaalluartillugu ullormut oqaluuserisassatut siunnersuusiussaaq, allakkatigut atortussanik siulersuisut ataatsimiinneranni oqaluuserineqartussanik ilaqartillugu. Ullormut oqaluuserisassatut siunnersuutip siulersuisunut ilaasortanut nassiutinnginnerani siulittaasoq oqaloqatigineqaqqaassaaq. Inaarutaasumik ullormut oqaluuserisassat ilanngussallu attuumassuteqartut kingusinnerpaamik nassiunneqarsimassapput siulersuisut ataatsimiinnissaannut ullut 14 sioqqullugit.

§ 3.3. Siulittaasoq allamik aalajangiisimanngippat, nalinginnaasumik ataatsimiinnermi ullormut oqaluuserisassat minnerpaamik imarissavaat:

a) Ullormut oqaluuserisassat inaarutaasumik akuerineqarnerat kingullermillu ataatsimiinnermit imaqarniliap atsiorneqarnera.

b) Siulittaasup ilisimatitsissutai.

c) Forstanderip nalunaarutaa.

d) Suliat sammisallu oqaluuserineqartussat oqaatigineqarnerat.

e) PI/SPS Naalakkersuisoqarfiullu akornanni angusaqarnissamik isumaqatigiissummi atuuttumi killiffik.

f) PI/SPS’p ingerlatsinera pillugu pingaarnerusutigut oqallinneq.

g) Missingersuutinik malitseqartitsineq, piffissamut kingullermut naatsorsuutit il.il.

h) Siulersuisut aalajangerneri illup iluanut avataanullu ingerIateqqinneqartarnerat

i) Siulersuisut tulliani ataatsimiinnissaata ullulerneqarnera.

j) Tamalaat.

§ 3.4. Oqaluuserisassat ullormut oqaluuserisassanut ilanngukkusutat, siulittaasumit tigoreerneqarsimassapput kingusinnerpaamik ullut 14 ataatsimiinnissaq sioqqullugu.

Ataatsimiinnerup aqunneqarnera

§ 4. Siulersuisut ataatsimiinnerat siulittaasumit aqunneqassaaq. Siulittaasoq pisinnaanngikkuni, siulittaasup tulliata ataatsimiinneq aqussavaa.

§ 4.1. Siulersuisut aalajangiisinnaassuseqarput ikinnerpaamik ilaasortat affai ataatsimiinnermut peqataappata. Suliat amerlanerussuteqartunit aalajangiivigineqartassapput, ileqqoreqqusani allamik aalajangersagaqanngippat. Taasisut amerlaqatigiippata siulittaasup taasinera aalajangiisuussaaq, taannalu peqanngippat siulittaasup tulliata taasinera aalajangiisuussalluni.

Sulianut piginnaasalinnik atuineq

§ 5. Siulersuisut ataatsimiititaagallartumik pilersitsisinnaapput siulersuisunut aalajangiinissamut tunngavissiamik suliaqarnissaa siunertaralugu, tamanna siunertamut naapertuuttutut nalilerneqarpat. Ataatsimiititaliap sulinera naammasseriarpat atorunnaarsinneqassaaq.

§ 5.1. Siulittaasoq forstanderi siunnersioqatigereerneratigut aalajangersinnaapput ullormut oqaluuserisassat oqaluuserineqarnerannut atatillugu sulianut piginnaanilimmik aggertitsissallutik.

§ 5.2. Siulersuisut aammattaaq ataatsimiititamik immikkut suliaqartussamik pilersitsiniarlutik aalajangersinnaapput.

Imaqarniliat

§ 6. Forstanderi siulersuisut ataatsimiinneranni imaqarniliortoqarnissaanut akisussaasuuvoq. Taamatuttaaq atuuppoq aalajangernernut, ataatsimiinnerni oqarasuaatikkut ingerlanneqartuni imaluunniit allattariarsornikkut tunngaveqartuni. Imaqarniliami siulersuisut aalajangernerat aalajangernermullu tunngaviusut allanneqarsimassapput, taakkununnga ilanngullugu paasissutissat pingaaruteqartut, atortussani allassimasuni takussaanngitsut, imaqarniliami innersuussutigineqartut. Imaqarniliaq siulittaasumit allakkatigut (elektronisk) tusarniaareernikkut akuerineqassaaq tamatumalu kingornatigut siulersuisunut ilaasortanut forstanderimullu nassiunneqassalluni kingusinnerpaamik ataatsimiinnerup ingerlanneqarneranit sapaatit akunneri 2 qaangiunnerani.

§ 6.1. Siulersuisuni ilaasortaq imaluunniit forstanderi imaqarniliami aalajangiisuusumik uparuagassaqaruni, tamanna siulittaasumut allakkatigut nalunaarutigineqassaaq kingusinnerpaamik imaqarniliap tiguneraniit sapaatit akunnera 1 qaangiutsinnagu. Uparuaasoqanngippat imaqarniliaq akuerineqartutut isigineqassaaq.

§  6.2. Imaqarniliaq akuerineqarsimasoq siulersuisuni ilaasortanit tamanit forstanderimillu ataatsimiinnerup tulliani atsiorneqassaaq, ataatsimiinnermi peqataasimanerat apeqqutaatinnagu.

§ 6.3. Immikkoortoq h – ”Siulersuisut aalajangerneri ingerlateqqinneqartarnerat” oqaluuserisassani aalajangersimasumik ilaasassaaq. Tassani aalajangerneqartassaaq aalajangernerit qanoq ingerlateqqinneqartassanersut.

Suliami peqataasinnaannginneq

§ 7. Siulersuisuni ilaasortaq imaluunniit forstanderi PI/SPS-ilu akunnerminni apeqqummut aamma isumaqatigiissummut namminermut allamulluunniit tunngassuteqartumut, apeqqummut isumaqatigiissummulluunniit pineqartumut annertuumik soqutigisaqaruni oqaluuserineqarnerani peqataasinnaanngilaq.

§ 7.1. Siulersuisunut ilaasortaq pisussaavoq sapinngisamik siusissukkut siulersuisunut paasissutissiissutigissallugu suliami peqataasinnaannginnini pillugu, takuuk suliassat suliarineqartarnerat pillugu inatsimmi tamanna pillugu aalajangersakkat.

§ 7.2. Siulersuisut ilaasortap suliami peqataasinnaannginnera pillugu inaarutaasumik aalajangiivigissavaat.

Siulersuisut forstanderimut atugassarititaat

§ 8. Siulersuisut PI/SPS’p ulluinnarni aqunneqarneranut sinaakkutinik aalajangersaassapput, forstanderimit isumagineqartunik.

§ 8.1. Siulersuisut forstanderillu akornanni suliassat agguataarneqarnerannut najoqqutassiussapput, tassunga ilanngullugu forstanderip PI/SPS-mik aqutsinerata nakkutigineqarnera.

§ 8.2. Forstanderip akisussaaffigaa qulakkiissallugu, siulersuisut paasissutissanik pingaarutilinnik tamanik pissarsinissaat.

§ 8.3. Forstanderip nalinginnaasumik ataatsimiinnernut tamanut ingerlatsineq pillugu nalunaarusiaq suliarisassavaa (forstanderip nalunaarutaa).

§ 8.4. Forstanderip qulakkiissavaa, ukiumi kingullermik ataatsimiinnermi ullormut oqaluuserisassani  immikkoortumik ukiumut naatsorsuuteqarfiusumut aggersumut missingersuutit akuerineqarnissaannik imaqartumik.

§ 8.5. Forstanderi siulersuisut ataatsimiinneranni peqataasarpoq ataatsimiinnernilu oqaaseqarsinnaatitaalluni.

§8.6. Siulersuisut forstanderip oqartussaaffiinut akuliuteqqusaanngillat. Taamaattumik suliffeqarfiup sulisui siulersuisunut ilaasortanit saaffigineqarsinnaanngillat ilitsersorneqarnatilluunniit.

Siulersuisut siulittaasuat

§ 9. Siulersuisut siulittaasuat siulersuisunut ilummut avammullu sinniisuuvoq. Siulittaasup nakkutigissavaa PI/SPS’p inatsisit, PI/SPS’p ileqqoreqqusai aamma una suleriaaseq eqqortinnerai. Siulersuisut ataatsimiinnerini tamani siulittaasoq pissutsinik PI/SPS-imut pingaarutilinnik siulersuisut sinnerinut ilisimatitsisassaaq, siulittaasup siulersuisut ataatsimiinnerisa siuliata kingornatigut ilisimalersimasaminik.

§ 9.1. Siulersuisut siulittaasuata siulersuisut sinnerlugit forstanderimik ingerlaavartumik attaveqartassaaq.

§ 9.2. Siulersuisut aalajangernerat PI/SPS-imut ingerlateqqinneqassaaq siulersuisuni siulittaasup forstanderimut saaffiginnissuteqarneratigut.

§ 9.3. Siulersuisut siulittaasuata peqannginnerani siulittaasup tullia siulittaasumut sutigut tamatigut sinniisuusassaaq.

Aningaasaqarneq pilersaarutillu pingaarnerit

§ 10. Forstanderi ukiumut naatsorsuuteqarfiusumut aggersumut missingersuutitut siunnersuusiortassaaq kiisalu ukiunut arlalinnut missingersuutit siulersuisut akuerisassaannik.

§ 10.1. Forstanderip piffissami killiffik kiisalu ukiup affaanut nalunaarusiaq aamma missingersuut kukkunersiorneqarsimasoq siulersuisunut akuerisassanngorlugit suliarisassavai.

§ 10.2. Forstanderi ukiumut nalunaarusiassatut siunnersuut suliarisassavaa, siulersuisunut akuerisassanngorlugu saqqummiunneqartussaq.

§ 10.3. Forstanderi siulittaasoq suleqatigalugu naammassisaqarnissamik isumaqatigiissut siulersuisunut akuerisassanngorlugu suliarisassavaat, Ilinniartitaanermut Naalakkersuisoqarfimmik naammassisaqarnissamik isumaqatigiissuteqarnissaq siunertaralugu.

§ 10.4. Naalakkersuisoqarfimmik naammassisaqarnissamik isumaqatigiissut tunngavigalugu forstanderi iliuusissatut pilersaarummut siunnersuusiussaaq siulersuisunut akuerisassanngortitassaminik.

Suleriaasissap akuerineqarnera

§ 11. Suleriaasissaq siulersuisunit amerlanerussuteqartunit akuerineqarsinnaavoq allanngortinneqarlunilu.

§ 11.1.  Suleriaaseq kiisalu taassumunnga allannguutit Ilinniartitaanermut Naalakkersuisoqarfimmut ilisimatitsissutitut nassiunneqassaaq.

Taamaalilluni siulersuisut ulloq 25.01.2017-imi ataatsimiinneranni akuersissutigineqarpoq.