Takorluugaq

PI/SPS tassaavoq Kalaallit Nunaanni Perorsaanermik Ilinniarfik ilinniartitaanernik pikkorissarnernillu neqerooruteqartartuusoq, isumaginninnermik suliassaqarfiup iluani ilisimasatigut qaffassaaqataasoq. Sulinerput kalaallit inuiaqatigiit pisariaqartitaannit kiisalu NP Silarsuarmut anguniagaannit 17-init, Meeqqat pisinnaatitaaffii pillugit isumaqatigiissummit aamma inuit innarluutillit pisinnaatitaaffii pillugit isumaqatigiissummit aallaaveqarpoq. Perorsaaneq pillugu ilisimasaqassuseq aamma meeqqanut, inuusuttunut, inersimasunut utoqqarnullu neqeroorutini ataasiakkaat pisariaqartitaasa inuttullu ineriartornerisa isiginiarneqarnerannut akisussaassuseqarpugut.

PI/SPS-ip inuit ataasiakkaat ataatsimoortullu inunnit ataasiakkaanit ilaaffigineqartut nukittorsarusuppai.

• Inuiaqatigiinni perorsaaneq pillugu ilisimasaqassutsip pingaaruteqassusia isiginiarparput, tamanna innuttaasut tamarmik ineriartornerannut ingerlalluarnerannullu tunngavissiisuummat.
• Tunngaviusumik isuma aallaavigalugu sulivugut, tassalu perorsaanermik sulinermi ”inuk tamarmiusoq” aamma “inuit ataasiakkaat inunnik allanik susassareqateqarnerat” isiginiarneqassasut.
• Ilinniarfiorusuppugut akuerisaasoq orniginartorlu, piginnaaneqarfittut qitiusoq, ilisimasaqassutsikkut qajannaatsumik tunngavilik aamma isumaginninnerup perorsaanerullu iluanni ilinniartitaanernik siuariartornermik qulakkeerinnittoq.

PI/SPS-imi ilinniartitsinerup aaqqissuunneqarneranut piumassuseqartitsisoq tassaavoq nuna tamakkerlugu inuiaqatigiinnik ineriartortitseqataarusunnerput.

• Ilikkariartornissamut sinaakkutit nutaaliat inuiaqatigiinnullu attuumassutillit pilersikkusuppagut aamma suleqatit pimoorussisut piginnaasaat ineriartorteqqikkusuppavut, maligassiuisutut ilinniartut ilisimassuseqassusiannik susassareqatigiinnerannillu nukittorsaaqataasinnaasut.
• Ilinniarnermi avatangiisit ineriartorteqqikkusuppagut tamanut ataasiakkaanullu iluaqutaasumik ilinniartitaanerit pikkorissartitsinerillu piffissamut naleqquttut aaqqissuunneratigut.
• Ilinniartut naleqartitaat, sammivii perorsaanermilu piginnaanii ineriartortikkusuppagut suliffimmi misiliinerit suliffinnillu allanik paarlaaqatigiinnerit aqqutigalugit.
• Ilinniartut namminiussuseqarluartut1 ineriartornissaannut annertunerpaanik periarfissaqartikkusuppagut, inuiaqatigiinni innuttaasunik perorsaanermik sulinermut tunngatillugu eqqarsaatiginnissinnaassuseqartunik iliuuseqarsinnaassuseqartunillu aamma perorsaasutut sulinermik ineriartortitsisinnaassuseqartunik.

PI/SPS-ip iluani avataanilu suleqatigiinnissamut piumassuseqartitsisoq tassaavoq ilinniarnerup atuagarsornertaani suliffimmilu misiliinermi siuariartortoqarnissaa, kiisalu isumaginninnermik perorsaanermillu suliassaqarfiit iluanni atorfiit ilinniartitaanermilu neqeroorutit ineriartorteqqinnissaat.

• Qulakkeerusupparput ilinniartut atuagarsornermi ilisimaligaasa sulinermi atorneqarnissaannut annertunerpaamik periarfissaqarnissaat, suliffimmi misiliinerit ilinniarnermilu ingerlatsinerit pillugit ingerlatsiviit kiisalu ulluunerani aamma ulloq unnuarlu paaqqinnittarfiit qanimut suleqatigineratigut.
• Isumaginninnermik perorsaanermillu suliassaqarfiup ineriartortinneqarnissaa pillugu avataani suleqatigisartakkat oqaloqatigerusuppagut.
• Kalaallit Nunaanni avataanilu ilinniarfeqarfiit allat suleqatigerusuppagut ilinniartut piginnaasaasa ineriartortinnissaat ilinniaqqinnissamullu atugassarititaasut pitsaanerpaat qulakkeerusullugit.
• NGO-t sulinermillu inuussutissarsiuteqartut kattuffii suleqatigerusuppagut ilinniartut siunissami isumaginninnermi perorsaanermilu atorfiit ineriartortinneqarnerannut akuunissaannut sunniuteqaqataanissaannullu kaammattorusullugit

PI/SPS ilisimasanut, sulisinnaassusermut, piginnaanernullu katsersuuffiunissaa piumassuseqartitsivoq, isumaginninnermik perorsaanermilu suliassaqarfiup iluanni siunnersioqatigiinneq isumassarsioqatigiinnerlu periarfissinneqaqqullugit.

• Kalaaliussusermut atasumik ineriartortitsineq ilisimatusarnerlu iluaquserusuppagut.
• Perorsaanermut ilisimasaqassutsip naleqassusia isumaalu isiginiarusuppagut isumaginninnermillu suliassaqarfiup iluani oqalliseqataarusulluta.
• Isumaginninnermut ilisimasaqassuseqalersitsisut ilinniartitaanerit ineriartorteqqikkusuppagut isumaginninnermillu suliassaqarfik assigiinngitsunik suliallit suleqatigalugit suliniarfigerusullutigu.
• Ilinniarnermi avatangiisitut ilaattut digitali neqeroorutigaarput, taamaalillutik illoqarfinni nunaqarfinnilu innuttaasut isumaginninneq pillugu ilisimasaqassutsimik piginnaaneqarfimmillu ineriartortitsisinnaaqqullugit.